दशैँलाई काठमाडौंमा ४५ हजार खसीबोका भित्र्याइँदै

काठमाडौं – दशैंमा मासुको माग पूर्ति गर्न काठमाडौं उपत्यकामा झन्डै ४५ हजार खसीबोका भित्र्याइने भएको छ । निजी व्यवसायी र सरकारी संस्थानले काठमाडौंमा करिब आधा लाख सङ्ख्यामा खसीबोका भित्र्याउन लागेका हुन् ।

व्यवसायीहरू खसीबोका खरिद गर्न यतिबेला गाउँ–गाउँ पुगेका छन् । सरकारी स्वामित्वको खाद्य व्यवस्था तथा व्यापार कम्पनी लिमिटेडले पनि दशैंका लागि लक्षित गरी १५ सय खसीबोका र ३०० च्याङ्ग्रा खरिद गरी उपभोक्तालाई सहुलियतपूर्ण मूल्यमा बिक्री गर्ने जनाएको छ ।

लिमिटेडले जिउँदो खसी–बोका र च्याङ्ग्रा प्रतिकेजी १० रुपैयाँ छुट दिएर बिक्री गर्ने जानकारी दिएको छ । हाल बजारमा जिउँदो खसी प्रतिकेजी ६६० देखि ६८० रुपैयाँसम्म पर्छ ।

खसीबोका र च्याङ्ग्रा खरिदका लागि सरकारले ४ करोड रुपैयाँ बजेट समेत व्यवस्था गरेको कम्पनीका सूचना अधिकारी शर्मिला न्यौपाने सुवेदीले जानकारी दिइन् ।

कम्पनीले मकवानपुर, तुलसीपुर र मुस्ताङलगायत काठमाडौं उपत्यका आसपासका क्षेत्रबाट खसीबोका र च्याङ्ग्रा खरिद गरी ल्याइसकेको छ । बजार मूल्यको तुलनामा खाद्य कम्पनीले खसीबोका र च्याङ्ग्रा खरिदमा केही सहुलियत दिनेछ ।

दशैंलाई लक्षित गरी निजी व्यवसायीहरूले ठूलो परिमाणमा खसीबोका ल्याउँदैछन् । यस वर्षको दशैंका लागि काठमाडौं उपत्यकामा ४३ हजार हाराहारी खसीबोका भित्रिने अनुमान गरिएको चौपाया खरिद बिक्री संघका संस्थापक दीपक थापाले बताए ।