डाइनामोमाथि डर्टमन्डको प्रभावशाली जित

लण्डन – डाइनामो जाग्रेवमाथि ३-० को जित निकाल्दै बोरुसिया डर्टमन्डले युरोपेली च्याम्पियन्स लिगको राउण्ड अफ १६ प्रवेशको सम्भावना बलियो बनाएको छ।

डर्टमन्डले पहिलो चरण सुपर एटमा रहँदै सिधै राउन्ड अफ १६ मा प्रवेशको सम्भावना बलियो बनाएको हो। पाँच चरणको समाप्तिमा डर्टमन्ड १२ अंकसहित चौथो स्थानमा छ।

गएराति भएको खेलमा डर्टमन्डले ४१ औं मिनेटमा जेमी गिटेनको गोलमा अग्रता लिएको थियो। २० वर्षीय इङ्लिस खेलाडी गिटेनले टप कर्नरमा आकर्षक प्रहार गर्दै गोल गरेका थिए। यो सिजनको च्याम्पियन्स लिगका पाँच खेलमा उनको यो चौथो गोल हो।

५६ औँ मिनेटमा रेमी बान्सेबैनीको हेड गोलमा डर्टमन्डले अग्रता फराकिलो बनाएको थियो। खेलको अन्त्यमा सचेए गुरेसीले थप एक गोल गरेका हुन्। रेड स्टार बेलग्रेडले भने पहिलो जित हात पारेको छ। बेलग्रेडले घरेलु भूमिमा भएको खेलमा जर्मन क्लब स्टुगार्टलाई ५-१ ले हराएको हो।